Состојбата на автопатите во Германија е загрижувачка од многу аспекти, особено поради петте илјади мостови кои итно треба да се поправат. Тие главно беа изградени пред 1985 година, кога дизајнерите пресметуваа со помали и полесни возила, како и со пониско сообраќајно оптоварување.
Дел од влошувањето на инфраструктурата се должи на тоа што во последниве години не беа вложени доволно ресурси во обновување и одржување на мостовите. Германската влада го препознава проблемот, но обновувањето на сите мостови во исто време не е можно. Волкер Висинг, сојузен министер за транспорт, во 2022 година изјави дека сакаат да обноват 400 мостови годишно, но работата преставува задача која ќе се протега преку неколку генерации. На пример, мостот Рахмеде во Северна Рајна-Вестфалија беше затворен крајот на 2021 година, а по уривањето, изградбата на новиот мост најрано може да биде завршена во 2026 година. Состојбата околу мостот Рахмеде добро ги покажува предизвиците: од затворањето, малиот град Лиденшајд и околните села претрпуваат значителен сообраќаен и еколошки стрес, што доведува до километарски гужви, бучава и загадување. Сето тоа е отежнато од финансиските дефицити и зголемувањето на трошоците.
Германската влада ќе мора да спроведе строги мерки за штедење од 2025 година за да се усогласат со уставната сопирачка на долгот. Инфлацијата и зголемувањето на трошоците за работна сила дополнително ги зголемуваат трошоците за градење. Во 2023 година беа одвоени 4,6 милијарди евра за обновување на автопатите и мостовите, и според плановите, оваа сума ќе се зголеми на 5 милијарди евра годишно од 2025 година. Сепак, според државната компанија Autobahn GmbH, за периодот помеѓу 2025 и 2028 година ќе бидат потребни дополнителни 5,5 милијарди евра за да се донесат мостовите во соодветна состојба.
