Të dhënat e trafikut të autostradave kroate për qershorin e këtij viti tregojnë se ka një rritje të konsiderueshme në trafikun e automjeteve, gjë që jo vetëm që i befasoi ekspertët, por gjithashtu shkaktoi bllokime serioze. Sipas gazetës kroate Jutarnji List, në qershor lëvizën 586 917 automjete më shumë në autostrada se në të njëjtin muaj vitin e kaluar, ndërsa në gjashtë muajt e parë të vitit janë regjistruar gjithsej 44 480 545 automjete, çka është 4.3 milion më shumë krahasuar me të njëjtën periudhë të vitit të kaluar. Pas rritjes së trafikut qëndrojnë disa arsye: anëtarësimi i Kroacisë në zonën Schengen, futja e euros, lufta në Lindjen e Mesme, valët e nxehtësisë dhe zjarret në Greqi, të gjitha këto kontribuan që vendi të bëhet një destinacion atraktiv për turistët me makinë, veçanërisht për gjermanët, të cilët këtë vit planifikojnë udhëtime më të shkurtra bregdetare. Megjithatë, rritja e trafikut të automjeteve ka rezultuar në bllokime të konsiderueshme, të cilat janë edhe më të përkeqësuara nga stili i drejtimit të shoferëve.
Të ashtuquajturat "ndalime fantazmë" janë të zakonshme, kur për shembull një kamion fillon parakalimin në trafik të dendur, ose kur shoferët që udhëtojnë me shpejtësi shumë të lartë frenojnë papritur. Sipas ekspertëve, për të lehtësuar problemet e trafikut duhet të vendosen kufizime të shpejtësisë, optimalisht në 80-100 kilometra në orë. Përveç kësaj, Kroacia ka kohë që po mendon për modifikimin e sistemit të pagesave me portale. Sistemi i ri elektronik i pagesës së vinjetave, i cili do të përjashtonte pagesën me para dhe do ta bënte të detyrueshëm përdorimin e pajisjeve elektronike në bord, do të ishte i disponueshëm më së hershtëri në vitin 2026. Kjo do të mundësonte lëvizjen e lirë gjatë pagesës së vinjetave pa u ndalur. Ndërmarrja që menaxhon autostradat kroate (HAC) gjithashtu do të zbatojë tarifën verore, e cila rrit vinjetat për dhjetë përqind nga 1 korriku deri më 30 shtator. Kjo tarifë, megjithatë, nuk zbatohet për mjetet e rënda si autobusët dhe kamionët. HAC justifikon futjen e tarifës sezonale me faktin që rreth 40 përqind e trafikut vjetor bie në muajt e verës, kur kostot e mirëmbajtjes, sigurisë, mbikëqyrjes dhe menaxhimit të trafikut gjithashtu rriten ndjeshëm.
